Aldundiak "Bizkaia Repara" kanpainaren hirugarren edizioa abiarazi du, ezaugarri berri batekin: bigarren eskuko zenbait artikulu saltzen dituzten establezimenduak ere sartu ditu
Bizkaiko Foru Aldundiak bonuak trukatzeko "Bizkaia Repara" kanpainaren beste edizio bat abiarazi du, produktuak konpontzen dituzten establezimenduentzat. Aurtengo kanpainak, gainera, ezaugarri berri bat izango du: erabilitako produktu jakin batzuk saltzen dituzten establezimenduak ere sartuko dira. Atxikitzeko epea urriaren 6an amaituko da.
Barakaldo, 2026ko irailaren 18a
Kanpaina honetan, 10 €-ko deskontu-bonuak trukatuko dira atxikitako Bizkaiko establezimenduetan, 20 euro edo gehiagoko bigarren eskuko produktu eta konponketa-zerbitzu jakin batzuk ordaintzean. Pertsona bakoitzak gehienez 5 bonu erabili ahal izango ditu, eta bonuak metagarriak izango dira.
Onartutako salmenta- edo konponketa-zerbitzuak
- Ondasun erabilien (altzariak, jantziak eta/edo etxean erabiltzeko ohiko tresnak) txikizkako merkataritza.
- Ehungintza eta osagarriak konpontzea.
- Etxetresna elektrikoen eta etxerako eta lorategirako ekipoen konponketa.
- Etxeko ordenagailuen eta periferikoen konpontzea.
- Oinetakoak eta larruzko gaiak konpontzea.
- Altzariak eta etxeko gauzak konpontzea.
- Etxean erabiltzeko komunikazio-ekipoak konpontzea.
- Etxean erabiltzeko audio, argazki eta bideoko aparatu elektronikoak konpontzea.
- Erlojuak eta bitxiak konpontzea.
- Beste gauza pertsonal batzuk eta etxean erabiltzeko gaiak konpontzea.
Onartutako EJZren epigrafeak
- 656: Ondasun erabilien txikizkako merkataritza, esaterako, altzariena, jantziena eta/edo etxean erabiltzeko ohiko tresnena.
- 691.9: Bestelako kontsumo-ondasunen konponketa.
- 691.1: Etxerako gai elektrikoak konpontzea.
- 699: Beste konponketa batzuk.
- 971.3: Arropak zuritu eta konpontzea.
Kontsumitzaile onuradunak
Kanpaina 16 urtetik gorako pertsonei dago zuzenduta. Pertsona bakoitzak gehienez 10 €-ko 5 bonu erabili ahal izango ditu, ordaintzeko unean atxikitako establezimenduetan eskatuz. Bonuak erosketa edo konponketa batean edo gehiagotan, eta establezimendu batean edo gehiagotan erabili ahal izango dira.
Atxikitako enpresek pertsona identifikatzeko datuak beteko dituzte plataforma batean, eta trukea egiteko erosketa-tiketaren kopia erantsiko dute.
"Bizkaia Repara" bonuak 2026ko azaroaren 5etik 2027ko otsailaren 5era bitartean trukatu ahal izango dira.