GARAPENek lantaldea osatu du migratzaileen ekintzailetza sustatzeko, ekonomiaren eta jendartearen hazkunderako aukera gisa
Gaur, martxoaren 1ean, GARAPENek, Getxoko Udalarekin batera, deialdia egin die estatu osoko hiriei aniztasunaren kudeaketan aurrera egiteko, ekintzaile migratzaileei laguntza emanez.
Ekimena MEGA Proiektuaren (Migrant Entrepreneurship Growth Agenda) baitan dago, zeinaren finantzaketan COSME programa europarrak (2014-2020) ere parte hartu duen (http://migrant-entrepreneurships.eu). Proiektuburua MPG (Migrant Policy Group) da, eta, GARAPENez gain, Italia, Frantzia, Alemania, Belgika eta Espainiako bazkideek parte hartzen dute.
Hauek dira MEGAren helburuak: hirien beharrak aztertzea, migratzaileen ekintzailetza bultzatzeko lan-esparruan; eragile konprometitu guztien artean sare nazionalak sor daitezen sustatzea; plataforma transnazional bat eratzea, EBko hainbat herrialdetako eragile konprometituek esperientzien eta ezagutzen berri eman ahal izateko elkarri; eta gomendio politikoak proposatzea zein estatuko nahiz EBko erakundeekin epe luzerako elkarrizketak abiatzea.