Inguraldek ETEen berrikuntzarekin duen konpromisoa berritu du eta HAZINNOVA programarekin elkarlanean arituko da berriro

Eusko Jaurlaritzak enpresa txiki eta ertainetan kultura berritzailea sustatzeko duen programaren 2025. edizioak Inguralderen parte-hartzea izango du aurten ere eragile laguntzaile gisa.

"Enpresa guztiak animatzen ditugu, batez ere berrikuntzaren munduan oraindik urratsik egin ez dutenak, gurekin harremanetan jar daitezen eta programa honen esparruan finantzatutako mikroproiektuen aukerak aurki ditzaten", adierazi du David Solla Inguraldeko presidenteak.

Barakaldon, 2025eko ekainaren 18an

Inguralde Eusko Jaurlaritzaren HAZINNOVA programaren eragile laguntzaileetako bat izango da berriz ere, berrikuntzaren arloan enpresa txiki eta ertainak sustatu eta laguntzeko. Horrela, Barakaldoko Udalak kultura berritzailea garatzeko konpromisoa berritu eta indartu du udalerriko ETEen artean, batez ere ingurune horretan lehen urratsak ematen ari direnen artean.

"Aurten ere, Inguralde funtsezko eragilea da Barakaldoko enpresei laguntza espezializatua eta finantziazioa duten berrikuntza-mikroproiektuetarako sarbidea errazteko", gogorarazi du David Solla Inguraldeko presidenteak.

Era berean, Sollak nabarmendu du Eusko Jaurlaritzak – SPRIk eta Innobasquek kudeatuta – ETEei beren negozioetarako neurri berritzaileak hartzen laguntzeko duen gaitasuna eta aukera.

Zehazki, HAZINNOVA programak aukera ematen die Barakaldoko ETEei berrikuntza-proiektu txikiak modu errazean, azkarrean eta emaitza ukigarriekin ezartzeko 3 hilabeteren buruan. Enpresa onuradunek 50 orduko laguntza pertsonalizatua jasoko dute profesional adituen eskutik, 4.000 €-ra arte, ETEarentzat inolako kosturik gabe.

ETE onuradunek 2 mikroproiektu egin ditzakete gehienez, honako arlo hauen barruan: Ekoizpena, Bezeroak, Talentua/Pertsonak, Kudeaketa ekonomiko-finantzarioa, Prozesu administratiboak, Merkatu berriak, Produktua eta Logistika. 

Bestalde, interesa duten enpresek honako baldintza hauek bete behar dituzte: 5 pertsona edo gehiagoko plantillak izatea Euskadin, eta industriarekin lotutako industria-jarduerak edo zerbitzuak garatzea (handizkako merkataritza, logistika, arkitektura, ingeniaritza eta aholkularitza, IKTak eta telekomunikazioak, finantzak eta aseguruak, edizioa, publizitatea eta marketina).

HAZINNOVAren laguntzak eskatzeko epea urriaren 29an amaituko da. Programari buruzko informazio guztia SPRIren webgunean dago eskuragarri, HAZINNOVA atalean, eta Inguralderen ohiko kanalen bidez ere kontsulta daiteke.