Barakaldo erreferente izango da bigarren urtez jarraian "Etorkizuneko Hiriak" biltzarrean, non hiri-eraldaketarako aukerak eta joerak aztertuko diren

Ekimen honen bigarren edizioa datorren asteazkenean, urriaren 4an, izango da Bilboko Campos Eliseos Antzokian. Bertan, hiriko erronka nagusiei buruz eztabaidatuko duten eragile, entitate eta erakunde publikoek parte hartuko dute.

"Barakaldo bere bigarren hiri-eraldaketan murgilduta dago, eta horri esker, ondo kokatzen ari gara etorkizuneko erronka handiei aurre egiteko", ziurtatu du alkateak. 

Barakaldo, 2023ko irailaren 28a

Barakaldok "Etorkizuneko Hiriak" kongresuaren aurkezpena egin du gaur goizean BIC Bizkaia Ezkerraldearen egoitzan. Kongresuaren bigarren edizioa urriaren 4an egingo da, Bilboko Campos Eliseos Antzokian, eta eragile, entitate eta erakunde publiko ezagunek parte hartuko dute. Amaia del Campok, Barakaldoko alkateak, hitzordu honen garrantzia azpimarratu du. Barakaldoko udalerriak bigarren aldiz jarraian parte hartzen du udalerrian egiten ari den eraldaketa sozial eta urbanoaren erreferente gisa.

"Gurea bezalako hiri batentzat, bere bigarren hiri-eraldaketan murgilduta baitago, horrelako eztabaida-foroak aukera bikaina dira hasitako bidea baliozkotzeko", ziurtatu du alkateak aurkezpenean. "Hiri berritzailea garen aldetik, uste dugu ondo kokatuta gaudela etorkizuneko erronka handiei aurre egiteko, eta ziur gaude kongresu hau aukera bikaina izango dela hiri-eraldaketaren bidean aurrera egiten jarraitzeko", amaitu du.

Amaia del Campo alkateaz gain, bertan izan dira urriaren 4ko kongresuan parte hartuko duten hainbat erakunde eta erakundetako ordezkariak. Hauek dira: Rosalia Herrera, Red Innpulsoko idazkari teknikoa; Verónica Portell, Renfeko Komunikazio, Marka eta Publizitate ordezkaria (iparraldean); Pedro Jauregui, Eusko Jaurlaritzako Etxebizitza sailburuordea; eta Eduardo Lobato, Iberdrolako Euskadiko merkataritza-zuzendaria.

Parte-hartzaile guztiek adierazi dute, gaur egun, hirietako eta udalerrietako hiri-garapen iraunkorra beharrezkoa eta geldiezina dela, eta, horregatik, mota horretako foroak behar direla, hirigintza, ekonomia, mugikortasuna, ingurumena, energia, kultura edo segurtasuna bezalako arloak elkarri lotzeko. Helburua da hiriak eraginkorragoak izatea eta herritarrei zerbitzu hobeak eta berriak ematea, lehiarako eta balio erantsiko faktore bat sortzeko.

Barakaldoren kasuan, alkateak "Hiri-agenda, funtsak bildu eta planifikatzeko tresna gisa" izeneko mahai-inguruan parte hartuko du. Berarekin batera, Juan Carlos Abascal Ermuko alkateak eta Ainhoa Basabe Sestaoko alkateak eztabaidatuko dute. "Gogorarazi nahi dut Barakaldo Ministerioak Hiri Agendan hautatutako 10 hiri pilotuetako bat dela, eta horrek egiten ari den lana berariaz aitortzea eta apustu estrategiko horrekin jarraitzeko pizgarria dela", adierazi du del Campok.

"Etorkizuneko Hiriak" kongresuaren bigarren edizioko programari eta hizlariei buruzko informazio guztia eskuragarri dago webgune honetan: ciudadesdelfuturo.elcorreo.com